TEXNOLOGİYA

2017-ci ilin ilk altı ayı ərzində “Azərbaycan Respublikasında telekommunikasiya və informasiya texnologiyalarının inkişafına dair Strateji Yol Xəritəsi”ndə müəyyən edilmiş tədbirlərin icrası ilə bağlı hesabat açıqlanıb.

Xeberler.az hesabat istinadən bəzi məlumatları təqdim edir.

Məlumat verdiyimiz kimi, Strateji Yol Xəritəsi hazırlananda qeyd edilmişdi ki, Azərbaycanda telekommunikasiya və informasiya texnologiyalarının inkişafına dair müstəqil tənzimləyici qurumun yaradılması nəzərdə tutulub.

Lakin hesabatdan görünür ki, bu istiqamətdə hələlik heç bir iş görülməyib. Belə ki, sənəddə bu sahədə görülən işlərin icrası 0%-a bərabər göstərilib.

Həmçinin, mobil infrastruktura investisiya qoyuluşlarının artırılması ilə bağlı da  yeni fəaliyyət nəzərə çarpmır.

Sahibkarlıq subyektlərinin texnologiya əsaslı əməliyyatlarının genişləndirilməsi ,  biznesin iştirakı ilə texnoloji tədrisin yenilənməsi üçün nəzərdə tutulan işlərinin icrası ilə bağlı göstərici 0% faiz göstərilib.

Hesabatdan görünür ki, ilk altı ayda daha çox dövlət qurumlarının elektron xidmətlərinin qənaət edilməsi,  dövlət təşkilatlarında informasiya sistemlərinin təkmilləşdirilməsi diqqət ayrılıb. Belə ki, bu istiqamətdə nəzərdə tutulan işlərin 50%-i həyata keçirlib.

Maraqldır ki, inteqrasiya edilmiş fasiləsiz elektron səhiyyə infrastrukturunun yaradılması ilə bağlı işlərin 50%-i icra edilib.

Ümumiyyətlə isə, 2017-ci ilin ilk altı ayı ərzində “Azərbaycan Respublikasında telekommunikasiya və informasiya texnologiyalarının inkişafına dair Strateji Yol Xəritəsi”ndə müəyyən edilmiş tədbirlərin 9 faizi icra edilib, 35 faizinin icrası üzrə işlərə başlanıb.

Heabatda qeyd edilib ki, telekommunikasiya bazarının liberallaşdırılması üzrə tədbirlər çərçivəsində TASİM layihəsi üzrə Texniki-İqtisadi Əsaslandırmanın aparılması üçün ilkin şərtlər toplusu hazırlanmış və baxılması üçün bütün üzv olan operatorlara təqdim edilib.

Mövcud və yeni yaranan beynəlxalq trafik kanallarının alternativliyinin təmin edilməsi üzrə zəruri tədbirlər görülüb. MasterCard Worldwide beynəlxalq kart təşkilatı rəqəmsal ödənişlərin genişləndirilməsi ilə bağlı işlərə cəlb edilib.

Sözügedən təşkilatla birlikdə dövlət qurumları, kommersiya bankları ilə görüşlər keçirilmiş, sorğu və müsahibə təşkil edilmiş, nağd ödənişlərə təkan verən makro və mikro amillər müəyyən edilib.

Qeyd edək ki, təsir indikatoru üzrə qiymətləndirmə 2020-ci ildə və 2025-ci il üzrə aparılacaq.

Yarımillik hesabatda qiymətləndirmə əlaqələndirici qurum tərəfindən görülmüş işlərə dair təqdim edilmiş hesabat (2017-ci ilinilk 6 ayı üzrə), aidiyyəti tərəflərlə müzakirələr, əldə edilmiş təsdiqedici sənədlər və digər qiymətləndirmə vasitələri əsasında həyata keçirilib. Əlaqələndirici qurum isə Nəqliyyat, Rabitə və Yüksək Texnologiyalar Nazirliyidir.

Məltəm Talıbzadə