SOSİAL MEDIA

Məlumat verdiyimiz kimi, son dövrlərdə Azərbaycanda WhatsApp, Skype və digər bu kimi resurslara blok qoyulub.

Hazırda məsələ ictimaiyyətdə ciddi narazılıqla qarşılanır.

Xeberler.az olaraq məsələni diqqətdə saxlayır və oxuculara mütəmadi məlumat təqdim edirik. Eksepertlər bu kimi platformaların bloklanması əsas səbəbini təhlükəsizliklə əlaqləndirir.

Hazırda bu məhdudiyyətlərin nə vaxt aradan qaldırılacağı ilə bağlı  müzakirələr davam edir.

Məsələ ilə bağlı Azərbaycan İnternet Formunun rəhbəri, ekspert Osman Gündüz Xeberler.az-a bildirib ki, bütün bu olanlar onu göstərir ki, belə xidmətlər təqdim edən resurslar ölkədə adım-adım bloklana bilər.

Eksepert hesab edir ki, görünür, adı çəkilən resursların sahibləri hökumətlə əməkdaşlıq etmədiyi müddətcə bu məhdudiyyət aradan qalxmayacaq.

Osman Gündüz, informasiya münasibətlərinin və müxtəlif xidmətlərin reallaşmasında ciddi rol oynayan bu tip resursların uzun müddət məhdudlaşdırılmasının ölkəmiz üçün yolverilməz olduğunu diqqətə çatdırıb.

Forum prezidenti bu məqamda hökumət  tərəfindən alternativlərin təklif edilməsini doğru hesab edir:

“İndiki halda hökumət bəzi suallar ətrafında fikirləşməlidir: Hansı resurslardan istifadə etsin vətəndaşlarımız ?, Hansılar tövsiyə olunur ?, Beynəlxalq rabitə xidmətlərinin, rouminqin tariflərinin hədsiz baha olduğu bir şəraitdə vətəndaşlar nə etməlidir?, Bəlkə özümüzün bu tip resursumuzu yaradaq?, Bəlkə hökumət dəstək versin ki, bizim özümüzün bu tip milli startapı hazırlansın?. Bunlara cavab olmadığı halda Estoniyadakı kimi ümid qalacaq ki, mühit nə zamansa məcbur edəcək ki, kiminsə ağlına oxşar ideya gəlsin”.

Ekspert qeyd edib ki, hökumət tərəfindən bu sahədə ciddi addımların atılması vacibdir:

“Müharibə şəraitində olan ölkə üçün, son dövrlərdə xarici təsirlərin də ölkəmizə təsirlərinin artdığı müşahidə olunduğu bir zamanda təhlükəsizliklə bağlı atılan addımlar anlaşılandır və zəruridir. Bununla belə, yuxarıda qeyd olunanlarla bağlı hökumət tərəfindən ciddi addımların atılmasını, alternativlərin təqdim edilməsini, bu sahədə mövcud problemlərin həlli istiqamətində təsirli tədbirlər görülməsini vacib hesab edirəm".

Məltəm Talıbzadə