Bunun işsizlik yaradacağı qaçılmazdır "Bu sahənin inkişafı ilə əlaqəli ixtisasların, mütəxəssislərin, yeni kadrların hazırlanmasına diqqət etmək lazımdır"
Xeberler.az bildirir ki, dekabrın 15-də Parlamentlərarası İttifaqın Gənc Parlament üzvlərinin 5-ci Qlobal Konfransında "Güclü gələcək: sabahın iş yerləri” mövzusu müzakirə edilib. Mövzuya dair məruzəni təqdim edən Oksford Universitetinin professoru Daniel Susskind deyib ki, bu gün dünyada böyük problemlərdən biri işsizlikdir və 2020-ci ildə dünyada kütləvi işsizlik gözlənilir.
Professorun sözlərinə görə, bu problemin kökündə isə elm və texnologiyanın sürətli inkişafı və onun həyatımıza, əl əməyinə ciddi təsiri dayanır. Çünki texnologiyalar inkişaf etdikcə işçi qüvvəsinə, əl əməyinə ciddi ehtiyac qalmır. İşləri məhz həmin texnoloji avadanlıqlar, cihazlar görür.
Beynəlxalq Əmək Təşkilatının Bürosunda Şərqi Avropa və Mərkəzi Asiya üzrə direktor müavini Xoloud Alxaldi də çıxışı zamanı dünyada işsizlik problemi məsələsinə toxundu. Onun sözlərinə görə, bu gün dünya üzrə işsizlik həddi artıq 63 faiz səviyyəsindədir. Xoloud Alxaldi bu rəqəmin bəzi ölkələrdə daha yüksək olduğunu da diqqətə çatdırıb.
BƏT təmsilçisi deyib ki, xüsusilə gənclərin iş tapması ilə bağlı ciddi problemlər var. Ona görə də dünyanın qarşısında bu məsələ çox ciddi və aktual problem olaraq dayanır. Bu problemlərin, xüsusən də gənclərin işsizlik probleminin aradan qaldırılması yönündə daha ciddi addımlar atılmalı, böyük layihələr icra edilməlidir.
Konfransda çıxış edən "Azərkosmos” ASC-nin sədr müavini Rövşən Rüstəmov da bildirib ki, gələcəkdə dünyada texnologiyaların inkişafı nəticəsində bir sıra peşələr və iş növləri aradan qalxacaq, milyonlarla insan iş yerlərini itirməli olacaq.
R.Rüstəmovun hesabınca, növbəti illərdə bir çox işlərin avtomatlaşdırılmasının şahidi olacağıq. Broker, bank işçisi, hüquqşünas, auditor, kassir kimi peşələr növbəti 10 illər ərzində aradan çıxacaq. Ona görə də inklüziv dayanıqlı iqtisadi inkişaf üzrə "hamıya iş yerləri” şüarı altında işlər aparılmalıdır:
"Milyonlarla insan peşələrini dəyişməsə, işlərini itirəcəklər. İnsanlar bu riskləri nəzərə almalıdırlar, hökumətlər, qeyri-hökumət təşkilatları insanları maarifləndirməli və stimullaşdırmalıdırlar ki, yeni peşələrə yiyələnsinlər.
Azərbaycanda insan kapitalı gələcəkdə gözlənilən dəyişikliklərə uyğunlaşmağa hazırdır. Təbii ki, bunun arxasında düzgün qərarlar olmalıdır. Hazırda Azərbaycanın peykləri gənc azərbaycanlı mütəxəssislər tərəfindən idarə olunur”.
Azərbaycan İnternet Forumunun prezidenti Osman Gündüz də yeni texnologiyaların əmək bölgüsü, işsizliklə bağlı problemlər yaradacağının qaçılmaz olduğunu deyib. Lakin o hesab edir ki, hökumətlər, qərar qəbul edən şəxslər bunu əvvəldən görərək qabaqlayıcı addımlar da atmalıdır:
"Yəni ən azı bu sahənin inkişafı ilə əlaqəli ixtisasların, mütəxəssislərin, yeni kadrların hazırlanmasına diqqət etmək lazımdır. Transformasiya olmalıdır. Müasir texnologiyalardan istifadə bir tərəfdən işsizliyin çoxalmasına səbəb olsa da, digər tərəfdən yeni iş yerlərinin açılmasına şərait yaradır”.
AİF prezidentinin fikrincə, İKT həm də yeni biznes sahəsini ortaya qoyur. O, bu sırada onlayn ticarəti xüsusi olaraq qeyd edib: "İnsanlar bütün dünyada olan biznesi qoyurlar internetin üzərinə və beləliklə alış-veriş baş verir. Bu zaman yeni mütəxəssislərə ehtiyac yaranır".
Osman Gündüzün sözlərinə görə, ölkədə modernləşmə gedirsə, universitetlər, orta ixtisas və peşə məktəblərində yeni kompüter ixtisasları açılmalıdır.
