TƏDBİRLƏR

Gələn ay Azərbaycanda “Sosial Yeniliklər Düşərgəsi” (SYD) adlı sosial internet ideyaları müsabiqəsi təşkil ediləcək. SYD-dan verilən məlumata görə, bu müsabiqənin məqsədi əhalinin sosial problemlərini həll edəcək və ya əhalinin sosial tələbatlarına cavab verəcək ən yaxşı internet əsaslı layihələri müəyyən etməkdir.

Sözügedən müsabiqə mərkəzi Praqada yerləşən “Transitions” təşkilatı tərəfindən həyata keçirilir. Təşkilatçıların məqsədi bu tipli internet ideyaları arasından ən yaxşılarını seçmək, eləcə də, qalib gəlmiş layihənin reallaşdırılması üçün konsaltinq xidmətini təşkil etməkdir.

SYD-yə yaş, cins və digər məhdudiyyətlər olmadan ideya sahibi və ya ideyaların reallaşmasında iştirak edən şəxs kimi qoşulmaq olar.

Düşərgə zamanı təşkilatçılar bu iki qrupdan olan şəxsləri (ideya müəlliflərini və bu ideyaların həyata keçirilməsinə yardım edəcək insanları) bir araya gətirərək onların göndərilmiş ideyalara müvafiq olaraq komandalarda işləməsini təmin edəcəklər. İki gün ərzində komandalar ideyalarını layihə şəklinə salacaqlar.

Sonda münsiflər tərəfindən ən çox dəstəklənən iki komanda layihələrini reallaşdırmaq üçün pul mükafatı alacaq. Müsabiqədə layihələrin qiymətləndirilməsi münsiflər heyəti tərəfindən aparılacaq və münsiflər heyətinin böyük hissəsi SYD üzrə əcnəbi mütəxəssislər olacaq.

Hazırda düşərgəyə ideya qəbulu və iştirakçı müraciətləri açıqdır və qeydiyyat üçün son tarix 2 iyuldur.

İdeya sahibi və ya iştirakçı kimi müraciət etmək, ideyalara verilən tələblərlə tanış olmaq, eləcə də tədbir haqqında daha ətraflı məlumat almaq üçün Sosial Yeniliklər Düşərgəsinin saytına daxil ola bilərsiniz: www.syd-az.net

Xatırladaq ki, Azərbaycanda ilk belə tədbir ötən il sentyabrın 18-19-da məhz “Transitions” təşkilatı tərəfindən keçirilib.