"Xatırlayıram ki, bir neçə il öncə 4MAPS Bilgi Teknolojileri MMC Azərbaycanda böyük layihələr reallaşdıracağıını elan etmişdi. “4MAPS Bilgi Teknolojileri” MMC-yə Sumqayıt Kimya Sənaye Parkının rezidentliyi statusu da verilmişdi. 750-1500 nəfərlik iş yeri açacağını bildirmişdi".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspertin sözlərinə görə, şirkət "Pulsuz işlər" görəcəyini bildirsə də iki böyük tenderin də qalibi olub. Toplam 10 milyon manat vəsait əldə edib:
"“Rəqəmsal xəritə əsaslı platformanın yaradılması işlərinin görülməsi” və “Bakı şəhərinin Binəqədi və Nərimanov rayonları ərazisində PUA vasitəsilə Lidar çəkilişlərinin aparılması, 3D stereo modelin yaradılması, vektorlaşdırılması, naturada məlumatların toplanması və 3D ölçülü rəqəmsal kadastr xəritələrinin hazırlanması” işləri görülməliydi.
Xatrlayıram ki, Qarabağla bağlı coğrafi adların müəyyən edilməsi və Azərbaycancaya dəyişdirilməsi, xəritə dəyişiklikləri üzrə datanın toplanması və qlobal xəritələrdə dəyişdirilməsi ilə bağlı bir neçə hökumət qurumları tərəfindən reallaşıdrılan işləri də öz adına çıxmışdı.
Hazırda, Milli Məkan Məlumatları infrasturkturunun qurulması ilə bağlı hökumətin real işlərə başladığı indiki anda 4MAPS-ın harada olması, ötən layihələri ilə bağlı görülmüş işlərlə tanış olmaq istədim.
Lakin heç bir məlumat əldə etmək mümkün olmadı. 4MAPS-in köhnə ofisinin yerləşdiyi binaya yapışdırılan adının da oradan çıxarıldığı, ümumiyyətlə bu ofisdən çıxdığı bildirilir.
Azərbaycan reallığında bu tip "pulsuz işlər görən", "tenderlərdə" xeyli vəsaitlər mənimsəyib, işləri yarımçıq royub sonradan ölkəni tərk edən və indiyədək tapılmayan şirkətlər olub".
Ekspert bildirib ki, torpaqların elektron kadastrı sisteminin və rəqəmsal kadastr xəritələrinin hazırlanması üçün on illər öncə hansısa bir “Kutlubey Harita İnşaat Muhendislik Sanaye Ticaret LTD” şirkətinə də 100 milyondan çox vəsait verilib. Lakin sonradan onu da tapmaq mümkün olmadı və qeyd olunan işlərin əksəriyyətini müvafiq dövlət qurumları yenidən yerinə yetirməli oldu:
"İndi hökumət Milli Məkan Məlumatları infrastrukturunun qurulması kimi nəhəng bir layihəyə start verib. Kritik infrastruktura daxil edilə biləcək, yetərincə faydalı və strateji bir layihədir.
20 milyon bu layihəyə vəsait ayrılıb. Bu dəfə nəhayət ki, hökumət bu cür strateji bir layihəni yerinə yetrimək üçün, doğru addım ataraq yerli şirkət seçib. Ölkənin ən böyük İT şirkətlərindən olan CASPEL şirkəti bu nəhəng işi görəcək.
Maraqlı məqam odur ki, Milli Məkan Məlumatları üçün güman ki 4MAPS-ın dövlət vəsaiti hesabına hazırlamalı olduğu dataya ehtiyac olacaq. Görəsən belə bir data varmı, qeyd olunan işlər görülübmü və CASPEL şirkəti, yaxud İN 4MAPS-I tapıb ondan bu datanı ala biləcəkmi ? Yoxsa CASPEL həmin işləri yenidənmi görməlidir ?
Ümid edirəm 4MAPS “Kutlubey Harita …. “ kimi olmayacaq və gördüyü işlərin hesabatını təqdim edəcək".
