Bir neçə gün öncə Rusiyanın dövlət satınalmaları ilə bağlı rəsmi saytında, Zakupki.gov.ru resursunda Azərbaycana qarşı təxribata yol verilmişdi.
Bu resursda Rusiya Federasiyası Müdafiə Nazirliyinin Qarabağ ərazisindəki hərbi şəhərciyi ilə əlaqəli tenderində Qarabağ ərazisi "Dağlıq Qarabağ Respublikası" adlandırılmışdı.
Bununla əlaqəli Azərbaycan ictimaiyyəti ciddi narazılığını ifadə etmiş, hökumət səviyyəsində etiraz olunmuşdu.
Nəticədə Rusiya tərəfi bunun texniki səhv olduğunu bildirmiş, adı çəkilən tender də ümumiyyətlə ləğv edilmişdi.
Xeberler.az bildirir ki, Məsələyə Azərbaycan İnternet Formunun Prezidenti, ekspert Osman Gündüz münasibət bildirib.
"Bu məsələ gündəmə gələndə diqqətimi başqa bir məqam da cəlb etmişdi. Bu da adı çəkilən Zakupki.gov.ru resursunun funksionallığı ilə, daha dəqiq isə konkret link paylaşımı imkanları ilə bağlıydı.
Həmin məsələ gündəmə gələndə yenidən Zakupki.gov.ru və eTender.gov.az resurslarını müqayisə etdim. Əvvəllər də bu istiqamətdə, digər ölkələrin oxşar resursları arasında araşdırma aparmışdım.
Əvvəllər də qeyd etdiyim kimi, elektron satınalmalar irəliyə doğru addım olsa da, bu məqsədlə hazırlanan bizim eSatınalma portalı olduqca "kasıb" bir vəziyyətdədir.
Funksionallıqdan söhbət gedə bilməz. Qurumlar və kateqoriyalar üzrə müqayisələr aparmaq və ictimai nəzarət üçün gərəkli ola biləcək digər imkanlar yaradılmayıb, çeşidləmək və ümumiləşmələr aparmaq olmur, infoqrafikalar yoxdur.
Xatırlayıram ki, bir müddət öncə cəmi bir illik dövlət İT xərclərini hesablamaq üçün saatlarla zaman sərf etmişdim.
Nəinki funksionallıq, ümumiyyətlə bu resursda adicə linki paylaşmaq mümkün deyil.
Nəsə paylaşmaq üçün mütləq screen etməlisən. Digər dövlət informasiya sistemlərinə inteqrasiyalar yoxdur. Axtarış imkanları yetərli deyil və s. eTender.gov.az resursunu İqtisadiyyat Nazirliyi yanında Antiinhisar Dövlət Xidmətinin sifarişi ilə Elektron Hökumətin İnkişafı Mərkəzi hazırlayıb.
Ümid edirəm müxtəlif ölkələrin satınalma portallarının müqayisələrini bizim Antiinhisar Dövlət Xidməti və Vətəndaşlara Xidmət və Sosial İnnovasiyalar üzrə Dövlət Agentliyinin Elektron Hökumətin İnkişaflı Mərkəzi də aparıb.
Zakupki.gov.ru gündəmə gələndə yəqin bir daha nəzər salmaq imkanları olub".
Ekspertin sözlərinə görə, reallıq ondan ibarətdir ki, Azərbaycanda eSatınalma portalının hazırlanmasında eGov Mərkəzi bu sahədə dövlət siyasətini aparan qurum olaraq deyil, sanki bir İT şirkət olaraq iştitak edib.
"Çünki adi bir nəzər salmaqla görmək olar ki, satınalma portalında yetərincə qüsurlar var, rəqəmsal hökumət prinsipləri qorunmayıb.
Ümumiyyətlə, bir daha qeyd etmək istərdim ki, eGov Mərkəzinin kommersiya maraqlarını önə çəkməsi və tənzimləmədən uzaqlaşması ölkədə rəqəmsal hökumət quruculuğuna olduqca mənfi təsir göstərir.
Son zamanlar dövlət satınalmalarının təkmilləşdirilməsi və şəffaflığın artırılması istiqamətində müəyyən addımlar atılsa da ciddi problemlər qalmaqdadır.
Təəssüf edirəm ki, dəfələrlə qeyd olunmasına baxmayaraq adı çəkilən qurumlar eSatınalama resursunun təkmilləşməsinə diqqət yetirməyiblər. Bu sahədə ictimai nəzarət üçün çevik rəqəmsal imkanların yaradılması, media və vətəndaş cəmiyyəti üçün faydalı dataların təqdim edilməsi dövlət satınalmaları sahəsində vəziyyətin daha da yaxşılaşmasına kömək ola bilərdi".
