Rəqəmsal tələbə kartlarından necə istifadə olunur?
"Azərbaycan Universitetləri, İRİA və Elm və Təhsil Nazirliyi datası əsasında yeni dəyərlər formalaşdırırlar. Artıq bu data əsasında universitet tələbələri üçün rəqəmsal tələbə kartları yaradılıb. Yəni tələbələr SİMA imza ilə myGov tətbiqinə daxil olmaqla burada tələbə məlumatlarının əks olunduğu “tələbə kartı”nı əldə edirlər".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Osman Gündüzün sözlərinə görə, bu məlumatlar Elm və Təhsil Nazirliyinin myGov-a inteqrasiya olunan tələbə datası əsasında real vaxtda formalaşır:
"Bununla da tələbələr alternativ olaraq, fiziki formada tələbə kartı olmadan da tələbə məlumatlarını lazım olan yerlərə təqdim edə bilirlər. Ümumiyyətlə, tələbələr, vətəndaşlar tələbə biletini, şəxsiyyət vəsiqəsini və s sənədləri bölüşmək üçün
mygov mobil tətbiqində “Paylaş" düyməsindən istifadə edirlər. Bu zaman ekranda QR kod və 8 simvoldan ibarət (hərf, rəqəm qarışığı) sənəd nömrəsi əks olunur".
Ekspert bildirib ki, bu məlumatların yoxlanılması üçün də rəqəmsal həll yaradıb:
"Qurumlar “mygov Checker” platforması vasitəsilə sənədlərin doğruluğunu yoxlaya bilərlər. Hansısa qurumda sənədlərin yoxlanılması üçün qurum rəhbəri
checker.e-gov.az portalına daxil olub əməliyyatları icra edəcək əməkdaşlarına müvafiq səlahiyyətlər verməlidir.
Səlahiyyətli şəxs “mygov Checker” tətbiqində “QR skan et” düyməsilə QR kodu skan edə və ya həmin sənəd nömrəsi ilə identifikasiya edə bilər.
Təqdim olunan məlumatların yoxlama tarixçəsi myGov mobil tətbiqində “Paylaşdığım məlumatlarım” bölməsində əks olunur. Eyni zamanda yoxlayan qurumlar da tələbənin, vətəndaşın kim tərəfindən yoxlanıldığını görə bilir".
Osman Gündüz qeyd edib ki, artıq bu proses AzTU-da pilot qaydada tətbiq edilir:
"10 mindən çox AzTU tələbəsi myGov platformasını öz telefonlarına yükləyib. Yəni anlaşıqlı desək, artıq 10 mindən çox AzTU tələbəsi rəqəmsal tələbə kartına, rəqəmsal şəxsiyyət vəsiqəsinə və digər rəqəmsal sənədlərə sahib olub. İRİA və Elm və Təhsil Nazirliyi ilə əməkdaşlıq çərçivəsində bu istiqamətdə xeyli işlər görülüb.
Universitet rəhbərliyinin tapşırığı əsasında tələbələrin identifikasiyası üçün məsul olan şəxslər İRİA sistemində qeydiyyatdan keçiblər".
Ekspert bildirib ki, İRİA-nın dəstəyi ilə universitetin mühafizə xidmətinin əməkdaşları üçün təlimlər də təşkil edilib:
"Təlim zamanı səlahiyyətli şəxslərə rəqəmsal tələbə kartının məlumatlarının oxunması üçün, tələbələrin identifikasiyası üçün mövcud qaydalar izah edilib.
Düşünürəm ki, dövlətə məxsus datalardan efefktiv istifadə etməklə yeni dəyərlərin yaradılması yetərincə əhəmiyyətlidir və bu, ölkədə rəqəmsal transformasiya proseslərinin sürətlənməsinə təkan verir.
Digər universitetlər də tələbələrə myGov tətbiqi yüklətməklə və İRİA-nın rəqəmsal platformasında qeyiyyatdan keçməklə bu rəqəmsal xidmətlərdən faydalana bilərlər".
