"Ölkəmizdə aparılan rəqəmsallaşma və elektron hökumət quruculuğu vətəndaş-hökumət münasibətlərində və biznesdə daha münbit şərait yaratmalıydı, bürokratçılıq aradan qaldırılmalıydı.
Gözlənilirdi ki, dövlət sektorunda rəqəmsal transfromasiya nəticəsində toplanan böyük datalar hesabına dövlət idarəetməsi üçün daha effektiv qərarlar veriləcək.
Lakin müşahidələr, reallıqlar onu göstərir ki, bu sahədə müəyyən addımlar atılsa da hələlik gözləntilər özünü elə də doğrultmayıb".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspertin sözlərinə görə, bürokratçılığın aradan qaldırılmasında, daha çevik-effektiv qərarların qəbul edilməsində rəqəmsal hökumətin imkanları, yumşaq desək, yetərli olmayıb.
"Ayrı-ayrı dövlət qurumlarının öz daxilində uğurları daha çoxdur, datalardan hətta kommersiya məqsədilə istifadə imkanları formalaşıb. Amma bütövlükdə dövlət aparatı və biznes üçün, cəmiyyət üçün rəqəmsallaşma və data infrastrukturdan effektiv istifadədə problemlər var.
Bəzi sahələrdə isə, dövlət qurumları arasında inteqrasiya baş tutmadığından analoqu olmayan situasiya yaranıb, rəqəmsallaşma bürokratçılığı daha da artırıb. Bir dövlət qurumu digər dövlət qurumunun elektron, rəqəmsal məlumatını tanımadığından əlavə -yeni bürokratik münasibətlər formalaşıb.
Təsəvvür edin ki, xeyli sayda dövlət qurumları dövlətin elektron sistemində mövcud olan sənədləri, elektron çıxarışları yenidən kağıza çap etmək və yenidən notarial təsdiq etməyi tələb edir.
Hüquqi adı "elektron çıxarış" olan sənədin yenidən kağız formada çapını və notarial təsdiqini tələb etmək nonsesdir".
Osman Gündüz bildirib ki, bu cür halların yaranmasının əsas səbəblərindən biri də rəqəmsal hökumətə cavabdeh qurumun - EHİM-nin daha konseptual addımlar atmaq əvəzinə, bütöv qanunverici bazanı rəqəmsallaşma baxımından sadələşdirmək əvəzinə, inteqrasiyanı sona çatdırmaq əvəzinə hökumət tərəfindən verilən cari rəqəmsal həllərin yaradılmasına, bu məqsədlə çoxsaylı developerlər ordusu formalaşdırmağa, kommersiya layihələrinə üstünlük verməsidir.
"Qurum əlavə çoxsaylı bəsit layihələrə, kənar məsələlərə də zaman və resurslar ayırır.
Düşünürəm ki, prioritetlərin müəyyənləşməsində, sektora cavadehlik daşıyan Vətəndaşlara Xidmət və Sosial İnnovasiyalar üzrə Dövlət Agentliyinin strateji planlaşmasında müəyyən çatışmazlıqlar var. Hazırda prioritet olaraq daha çox ASAN-a investisiyalar yatırılır, resurslar daha çox ASAN-a ayrılır.
Görünən odur ki, elektron hökumətə cavabdeh qurum üçün ASAN 1-ci dərəcəli, rəqəmsal hökumət isə 2-ci dərəcəlidir. Hər iki sahə də VXSİ Dövlət Agentliyinin nəzarətindədir.
Hansı ki, indiki zamanda, Prezidentin çıxışlarında qarşıya qoyulan vəzifələr baxımından, hökumətin strateji addımları baxımından, dünyada gedən proseslər baxımından prioritetlər əksinə olmalıydı, rəqəmsal hökumət quruculuğu önə çəkilməliydi.
Görünür ki, burada artıq maraq toqquşmaları yaranır".
Ekspert qeyd edib ki, oflayn mühitə cavabdeh dövlət qurumu həm də rəqəmsal mühitin, rəqəmsal hökumətin formalaşmasına cavabdehlik daşıyır. Bu məqsədlə resursların bölünməsini də özü reallaşdırır və nəticədə ciddi problemlər yaranır.
"Düşünürəm ki, VXSİ Dövlət Agentliyi strategiyada korrektələr etməlidir, prioritet Rəqəmsal Hökumət olmalıdır.
Prezidentin son zamanlar Yerli İcra Hakimiyyətləri ilə bağlı verdiyi sərəncamları nəzərə alsaq, regional elektron hökumət quruculuğu proseslərini də nəzərə alsaq, fikrimcə gələcəkdə ASAN-ı elə Yerli icra qurumlarının binalarında formalaşdırmaq daha doğru olardı. Hansı ki Gədəbəy İcra Hakimiyyətində bu artıq reallaşdırılıb.
Beləliklə, düşünürəm ki, VXSİ Dövlət Agentliyi prioritet olaraq rəqəmsal hökumətin inkişafını önə çıxartmalı, dövlətə məxsus dataların inteqrasiyası və səmərəli istifadəsi üçün səyləri gücləndirməli, gələcəkdə ASAN üçün Yerli icra qurumlarının resurslarından istifadəyə üstünlük verilməli, dövlət xidmətləri sektorunda yeni, rəqəmsal idarəetmə modeli inkişaf etdirilməlidir".
