Elektron Hökumətin İnkişafı Mərkəzi bir daha açıqlayıb ki, eGov infrastrukturun özəyini təşkil edən ASAN Bridge sistemi artıq tam hazırdır. EHİM bir neçə ildir ki, bu haqda açıqlamalar verir.
Milli Məlumat Mübadiləsi Sistemi olan ASAN Bridge dövlət qurumlarının informasiya sistemlərinin inteqrasiyasında əsas rol oynayır. Məlumat mübadiləsi, inteqrasiya məhz bu sistem üzərindən gerçəkləşir.
Xeberler.az bildirir ki, bununla bağlı Azərbaycan İnternet Formunun Prezidenti, ekspert Osman Gündüz açıqlama verib.
Ekspert qeyd edib ki, eGov bundan sonra əsasən ASAN Bridge üzərində "oturacaq".
"Yeri gəlmişkən, indiyədək bizim eGov infrastrukturu xarici bir sistem, Estoniyaya məxsus ola X-Road sistemi üzərindən fəaliyyət göstərirdi.
VXSİ Dövlət Agentliyinin Elektron Hökumətin İnkişafı Mərkəzinin uzun illər üzərində işlədikdən sonra belə bir strateji milli məhsulu tam istifadəyə verməsi təqdirəlayiqdir. Amma maraqlı məqam odur ki, dövlətə məxsus informasiya sistemlərinin inteqrasiyasında çox ciddi problemlər hələ də qalır.
Dövlət qurumları bəh-bəhlə e-xidmətləri təbliğ etsə də və EHİM bu sistemlərin ASAN Bridge sisteminə qoşulduğunu bəyan etsə də real vəziyyət əksini göstərir. Hələ də dövlət qurumlarının bir çoxu digərlərinin elektron sənədlərini tanımır, onları kağız formada, notarial tesdiqlə vətəndaşdan yenidən tələb edir.
Bir dövlət qurumu elektron etibarnamənin, digər dövlət qurumu əmlakla bağlı elektron çıxarışın, başqa birisi isə hətta şəxsiyyət vəsiqəsi və yaşayış yerindən arayışın notaril təsdiqini istəyir.
Bu isə o deməkdir ki, hələlik ASAN Bridge üzərindən inteqrasiya başa çatmayıb. On illərdi eGov quruculuğunun, dövlət sektorunda rəqəmsal transformasiyanın aparıldını nəzərə alsaq bu tip hallar onu göstərir ki hələlik real nəticələr çox azdır".
Osman Gündüzün sözlərinə görə, yaxşı olardı ki, EHİM ASAN Bridge sisteminə qoşulanların, inteqrasiyası baş tutan dövlət qurumlarının siyahısını açıqlasın. Eyni zamanda inteqrasiya baş tutmayan dövlət qurumların siyahısı açıqlansın.
Göstərilsin ki, onların hansı xidmətləri, hansı bazalarının inteqrasiyası baş tutub. Düşünürəm ki kordinasiyaya cavabdeh qurum oaraq EHİM dövlət nəzarəti və ictimai nəzarətin gücləndirilməsi imkanları baxımından da bunları dərc etməsi çox faydalı olardı".
Ekspert qeyd edib ki, VXSİ Dövlət Agentliyi də hər il xidmətlərin keyfiyyəti ilə bağlı Hesabatında bu məqamlara ayrıca diqqət yetirməli və məlumatları tam açılamalıdır.
"Ötən dəfə adi bir xidməti əldə edərkən iki nəhəng dövlət qurumunu özüm aşkar etdim ki, hələ də vətəndaşlardan kağız sənədlər, notarial təsdiqlər tələb edirlər.
Dövlətdə elektron fofmada olan bir sənədi sistemdən çıxardıb, notarial da təsdiqləmək, yumşaq desək, xoşagəlməz bir situasiya idi.
Yaxşı olar ki, EHİM Ədliyyə Nazirliyi ilə birgə dövlətə məxsus informasiya sistemlərində elektron formada mövcud olan sənədlərin yenidən kağıza çevrilməsi və notarial təsdiqini qadağan edən bir norma hazırlasınlar. Adında "elektron" sözü olan sənədi kağıza çevirib notarial təsdiq edən notariusları Ədliyyə Nazirliyi cəzalandırmalıdır".
