Azəriqaz əvvəlki illərdən fərqli olaraq sayğacların sıfırlanmasına vətəndaşları da cəlb edib.
Yəni güzəştli qaz həcmindən istifsadə etmək üçün mexaniki sayğac istifadəçiləri özləri məlumatı quruma ötürməlidir. Smart-kart tipli sayğaclarda isə gecə saat 00:00-dan etibarən limit özü avtomatik sıfırlanır.
Qurum sayğacların sıfırlanmasına vətəndaşların cəlbini işçi heyətinin bu prosesi fiziki olaraq çatdırmaması ilə izah edib.
Xeberler.az bildirir ki, Azərbaycan İnternet Formunun Prezidenti, ekspert Osman Gündüz məsələyə münasibət bildirib.
Ekspertin sözlərinə görə, dövlət xidmətinin əldə edilməsi prosesində vətəndaşın özü iştirak edir. İştirakın mahiyyəti də sayğacda olan informasiyanın Azəriqaz-a WhatsApp-la göndərməkdən ibarətdir. Burada söhbət 5 -10 nəfərdən deyil, yüz minlərlə vətəndaşdan gedir.
"Təsəvvür edin ki yüz minlərlə sayğac məlumatı messencerdən Azəriqaz kompüterlərinə kustar qaydada daxil edilir, billing sisteminə ötürülür və bunu əsasında qərarlar qəbul edilir.Burada xeyli risklərin yaranacağı da şəksizdir.
Azəriqaz indiyədək 100 mindən çox vətəndaşın "Sayğac fotosu WhatsApp" əmliyyatında iştirak etdiyini bildirib.
Maraqlı məqam odur ki, on minlərlə Smart sayğac istifadəçiləri də bilməyərəkdən, yaxud ehtiyatlanaraq bu prosesdə iştirak edib".
Osman Gündüz hesab edir ki, bu vəziyyət Azərbaycanın indiki rəqəmsal inkişafı baxlmından olduqca xoşagəlməz, qüsurlu bir vəziyyətdir.
"Təəssüf ki, Azəriqaz ötən illərdə kütləvi olaraq, elə də zərurət olmadan on minlərlə Smart sayğacları mexanikiyə çevirəndən sonra qərarların effekrtiv qəbulu üçün də zamanında ağlabatan mexanizlər hazırlaya bilməyiblər. Yeganə üstünlüyü ucuz olması olan mexaniki sayğaclara kütləvi keçidin problem yaradacağı gərək öncədən hesablanaydı.
Sayğacların Smart-dan mexanikiyə keçirilməsinə razılıq verən, bu prosesə nəzarət eməli olan İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti, həmçinin Energetika Nazirliyi və SOCAR da görünür ki indiki xoşagəlməz situasiyanın yaranacağını proqnozlaşdıra bilməyiblər.
Azəriqaz bu cür mexaniki sayğacların mərkəzlə və ya nəzarətçi ilə rəqəmsal əlaqəsini təmin edən əlavə elektron qurğuların da quraşdırılıcağını bildirsə də görünür ki, bunu vaxtında reallaşdıra bilməyib".
Ekspert qeyd edib ki, son zamanlar vətəndaşlarla informasiysa münasibətlərini daha effektiv mexanizmlər üzərindən, şəffaf formada həyata keçirən Azəriqaz görünür ki, mexaniki sayğacların istismarı üçün normal mexnizmləri hələlik qura bilməyib.
"Həm "Asan Kommunal" sahəsində və həm də eGov sahəsində səlahiyyətli qurum olan ASAN üçün, daha dəqiq desək VXSİ Dövlət Agentliyinin Elektron Hökumətin İnkişafı Mərkəzi, elə bu Agentliyin İnnovasiyalar Mərkəzi üçün bu vəziyyət, yumşaq desəm, düşündürücü olmalıdır.
Düşünürəm ki, adı çəkilən qurumlar, kommunal strukturlarla birgə "Asan kommunal" Mərkəzlərin yaradılması haqqında Prezidentin 2016-cı il tarixli fərmanına və "Strateji Yol Xəritəsi" nin tələblərinə uyğun olaraq zamanında kommunal xidmətlər sahəsində təkmilləşdirilmiş mexanizmlər və mütərəqqi idarəetmə sistemlərini formalaşdırmalıydılar".
