"İKT üzrə ekspert, kibertəhlükəsizlik sahəsində azsaylı peşəkar mütəxəssislərdən olan İlqar Əliyev 4 il azadlıqdan məhrum edilib".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib:
Ekspert bildirib ki, uzun müddət İKT sektorunda peşəkar birisi olaraq tanınan İlqar Əliyevlə bağlı son bir ildə baş verənləri izləməyə çalışırdım:
"İstintaq altında idi. Həmişə dostlardan, yaxınlarından onun haqqında soruşurdum. Xahiş edirdilər ki, məhkəməsi başa çatanadək ictimailəşdirməyək.
Bir neçə gün öncə məhkəməsi başa çatıb və bildiyim qədər o qanunsuz narkotik maddə daşıması ittihamı ilə 4 il azadlıqdan məhrum edilib.
Özü isə bunları böhtan olaraq dəyərləndirib və baş verənlərlə bağlı dövlət başçısına
müraciət edib".
Osman Gündüzün sözlərinə görə, kibertəhlükəsizlik və informasiya təhlükəsizliyi sahəsində olanlar onu yaxşı tanıyır:
"Hətta jurnalistlərin də çoxu onu tanımalıdır, həm əvvəllər bizim təşkil etdiyimiz İKT təlimlərində, həm də sonra müxtəlif təlim və semminarlarda onu təlimçi və moderator olaraq görmək olurdu. Bilik və bacarıqlarını bölüşməyi, müxtəlif media təlimlərində jurnaistlərə və gənclərə öyrətməyi xoşlayardı, mediada və TV-lərdə həm də maarifçiliklə məşğul olurdu.
Bəzi dostlarımız da onun məhz xaricdən maliyyələşməsi şübhə doğuran hansısa təlimlərə dəvət alması, həmişə olduğu kimi rəqəmsal transformasiyaya töhfə verməsi baxımından bu tədbirə də qatılmasından dolayı diqqət cəlb etməsini vurğulayırlar.
Belə bir halın absurd olduğunu düşünərək, bunun nə dərəcədə həqiqətə uyğun olmasını deməkdə çətinlik çəkirəm".
Ekspert qeyd edib ki, son dövrlərdə İlqar Əliyev Mərkəzi Bankda, Port Bakı limanında və digər qurumlarda və layihələrdə informasiya təhlükəsizliyi üzrə çalışırdı, FinTech-də və Banklar Assosiasiyasında İT üzrə ekspert idi:
"İlqar müəllimi uzun müddətdir həm peşəkar bir İT mütəxəssis olaraq, jurnalistlərin və gənclərin rəqəmsal savadlılığına həmişə diqqət yetirən, dürüst və nümunəvi, cəmiyyətimiz və dövlətimiz üçün çox faydalı bir insan olaraq tanıyıram.
Görünür ki, məhkəməsi olmadan, istintaq altında olduğu müddətdə ailəsi ədalətli bir qərar veriləcəyinə ümid olub, bu məsələnin ictimailəşməsində maraqlı olmayıb. Ona görə də sektorda çox adamın heç baş verənlərdən xəbəri olmayıb".
