STARTAP AZƏRBAYCAN

Son dövrlərdə ölkəmizdə gənclərin uğurlu  karyera qurmasına, onların təhsilinin və peşəkarlığının artırılmasına köməklik məqsədilə bir sıra qurumlar yaradılıb. Young Business Factory belə qurumlardan biridir .

Young Business Factory (YBF) Bakıda gənclər üçün professional təlimlərin keçirilməsi, onların  Universitetdə oxuduğu vaxtdan başlayaraq  çalışmaq istədikləri sahə üzrə tam ixtisaslaşması, təcrübə keçməsi üçün yaradılıb.

Xeberler.az olaraq YBF-nin  fəaliyyəti ilə yaxından maraqlanmaq  üçün  şirkətin ofisinə baş çəkdik.

 Business Factory –nin təsisçisi Rasim Adjalov  şirkətin yaradılmasının əsas məqsədi, hazırda hansı işlərin həyata keçirilməsi və şirkətin komandası barədə Xeberler.az-a ətraflı məlumat verib.

Təsisçinin sözlərinə görə, şirkət öz fəaliyyətinə  İstanbulda təşkil olunmuş layihə ilə başlayıb. Belə ki, 2013-cü ildə bu layihə çərçivəsində 5 Türkiyə Universitetində 30 nəfər azərbaycanlı gəncə biznes, layihələrin idarə olunması, menecment və s. mövzularda   təlimlər keçirilib. Daha sonra Azərbaycanda  YBF yaradılıb və ölkəmizdə gənclərin təcrübə keçməsinə yardım etməyə başlayıb.
Rasim Adjalov bildirir, onlar ilk  vaxtlar xarici tərəfdaşlarla əlaqələr qurub, məqsədlərini bildiriblər və  bunun nəticəsində özlərinə çoxlu sayda partnyor qazana biliblər.

Layihə rəhbəri deyir ki , fəaliyyətlərində gəncləri bu istiqamətdə daha da maarifləndirmək məqsədini prioritet seçiblər. Xarici şirkətlərə, qurumlara bu fəaliyyətə Azərbaycanda təlabat olduğunu inandıra biliblər.

Hazırda müxtəlif ölkələrdə  şirkətin  60-dan çox  tərəfdaşları var. Əsas fəaliyyət isə Azərbaycanda və xarici ölkələrdə praktiki profesional təlim, konfrans, onlayn kurs və seminarlar, müxtəlif təhsil proqramlarının keçirilməsini təşkil edir.

Öyrənirik ki, şirkətdə gənclərin sosial aktivliyini artırmaq, təhsillə bağlı problemlərinin həllində tələbələrə yardım etmək, onların   inkişafına töhfə vermək və təhsil, innovasiya və inkişaf üçün əlverişli şərait yaratmaq, elm və təhsilə olan marağı artırmaq üçün  təlimlər  xarici təhsilli, yüksək təcrübəsi olan mütəxəssislər tərəfindən keçirilir. Tələbələr və digər maraqlanan şəxslər də bu təlimlərdə iştirak edə bilirlər. 

YBF-də həmçinin müxtəlif beynəlxalq yarışlara  gənclərin hazırlaşdırılması   həyata keçirilir. Məlumat alırıq ki, 2014-cü ildə “Avropa Sahibkarlıq” çempionatında həmyerlilərimiz  müsabiqənin finalına qədər  gəlib və 24  ölkə içərisində 6-cı yerə çıxıblar.

Rasim  Adjalov deyir ki, son 1 ayda 1200-dən çox məşğələ təşkil olunub. Rasim  Adjalov qeyd edir ki, bəzən şirkətdə  iki ayda 1200 məşğələ təşkil edilir. 

Öyrənirik ki,  təlimdən sonra isə karyera məşğələləri keçirilir. Burada gənclərin  işlə təmin olunması,  iş karyerasında  manager və lider olmaq, özlərinin  işləyəcəyi  komanda üçün düzgün standartların seçilməsi kimi məsələlər ətrafında təcrübə keçirilir.

Həmçinin gəncləri motivasiya edib, düzgün idarə etməklə yaxşı nəticələr əldə etməyi, düzgün kommunikasiya qurmağı, bununla iş görüşlərində uğur qazanmağı, vaxtı düzgün bölüb, düzgün işləri düzgün görmək, yaranan problemləri həll etmək, düzgün qərarı qəbul etmək, kompleksləri aradan qaldırıb, özlərinə inamı necə artırmağın yolları tədris edilir. Bununla yanaşı, işlə bağlı müsahibədən keçmə qaydaları,  CV hazırlamaq,  Business Mail yazmaq da gənclərə öyrədilir. Layihə rəhbəri qeyd edir ki, Azərbaycanda əməkdaşlıq etdikləri otel şəbəkələrində, holdinqlərdə tələbələri asanlıqla işlə təmin edə bilirlər:

“Əməkdaşlıq etdiyimiz şirkətlər bizdən kadr tələb edəndə aktiv tələbələrimizi seçib əməkdaşlıq etdiyimiz şirkətlərə göndəririk".

Təlimlər ödənişli və ödənişsiz həyata keçirilir. Rasim Adjalov ətraflı məlumat verir:

- Təlimdə ödənişsiz  iştrak etmək istəyən tələbələrdən müəyyən şərtlər tələb olunur. Belə ki, onlar elektron müraciət  ərizəsini  dolduran zaman  motivasiya məktubu yazmalıdırlar və bizi inandırmaldılar ki, həqiqətən də konkret hədəfləri var. Yalnız sertifikat üçün olan müraciətləri qəbul etmirik.

YBF öz tələbələrinin xarici ölkələrdə  ödənişsiz olaraq təcrübə keçməsinə imkanlar yaradır. Bu yaxınlarda isə komandanın 8 Türkiyə universitetləri ilə birgə həyata keçirilən Beynəlxalq düşərgə baş tutub. 

Qeyd edək ki, YBF tələbələrini yalnız ölkədaxili şirkətlərdə yox, həmçinin xarici ölkələrdə də işlə təmin edə bilir. Avqustda şirkətdə təlim keçən tələbələrdən biri Türkiyədə karyerasına başlayacaq.

Hazırda Caspian Plaza və Dəmirçi Tower mərkəzi də daxil olmaqla YBF-nin 22 nəfər ştatda olan işçisi var.  10 nəfər isə Mərkəzlə ştatdan kənar əməkdaşlıq edir.

Rasim Adjalov gənclərin layihələrinə dəstək verməyə hazır olduqlarını bildirir:  “Qafqaz Universitetinin  tələbələrinin yaxşı layihələri olur, amma onların çalışmaq üçün iş yerlərinə ehtiyacları olur. Biz onlara ofisimizdə yer ayırmaqla tam şərait yaradırıq. Onu da deyim ki, bu reklam məqsədi ilə həyata keçirilmir. Məqsədimiz sadəcə işsiz gənclərə dəstək olmaqdır”.

Məlum olur ki, şirkətdə təcrübə keçən gənclərin 980 nəfərdən çoxu yüksək vəzifəli işlə təmin edilib.

Layihə rəhbəri qeyd edir ki, gənclər əsasən menecment sahəsinə maraq göstərir. Onun sözlərinə görə, Azərbaycanda gənclər Universitetə daxil olarkən bəzən ixtisas seçimində öz istədikləri sahəni seçmirlər və sonradan başqa sahədə işləmək istəyəndə çətinlik çəkirlər. Bunun üçün YBF  yaxın zamanlarda 1-ci kursdan başlayaraq gənclərə bu istiqamətdə ödənişsiz təlimlər keçirəcək. Həmçinin mühəndislik üzrə təlimlərin təşkilinə də başlanılacaq.

Rasim Adjalov deyir, komandanın fəaliyyətində Avropa sistemi tətbiq olunub. Təlim zamanı da ən çox praktik nəzəriyyələrə diqqət ayrılır:

“Çalışırıq gənclərə İT texnologiyaları ilə  təqdimat etməyi aşılaya bilək. Azərbaycanlı gənclərin böyük potensialı var, amma düzgün istiqamətləri və motivasiyaları yoxdur. Öz işlərini təqdim etməkdə çətinlik çəkirlər. Onlara bu məsələdə yardım etmək üçün  qrup işlərimiz var. Müsahibə zamanı deyəcək sözləri olsun deyə çoxlu təqdimatlar edir, praktik məsələləri müzakirə edirik. İş təcrübəsi olmayan gənclər  müsahibəyə qatılan zaman  YBF-də təcrübə keçdiklərini qeyd etsələr, şansları çox olar. Çünki biz onlara praktik mövzularla təcrübə keçirik və onlar bu məlumatlardan yararlana bilirlər”.

Müşahidələrimiz də göstərdi ki, Young Business Factory -də  gənclərin iş motivasiyasını artırmaq, karyeralarında diqqət etməli olduqları məqamları mənimsəmək üçün müasir səviyyəli şərait yaradılıb. Mərkəzin işçiləri də komanda  şəklində fəaliyyət göstərir. Müdir-işçi anlayışından çox bir-birləri ilə daimi ünsiyyətdə olan səmimi komandadırlar. Bu da onların uğurlarının ilk şərtlərindəndir.

Məltəm Talıbzadə