MÜSAHİBƏ

Məlumat verdiyimiz kimi, 9 nömrəli Bakı Peşə Liseyinin bazasında yaradılan IT STEP Akademy- kompüter akademiyası yaradılıb.

Bir neçə gün öncə Prezident İlham Əliyev də akademiya ilə tanış oldu.

Bu gün isə yeni mərkəz geniş ictimaiyyətə təqdim edilib.

Xeberler.az-ın məlumatına görə, təqdimat mərasimində Təhsil Nazirliyinin nümayəndələri, deputatlar, İT şirkət rəhbərləri, media nümayəndələri və bloqerlər iştirak edib.

Mərasimdə İT akademiyanın fəaliyyət istiqamətləri barədə ətraflı məlumat verilib.

Təhsil Nazirliyi yanında Peşə Təhsili üzrə Dövlət Agentliyinin direktoru Famil Mustafayev xatırladıb ki, IT STEP Akademiyası 17 ildir fəliyyət göstərir   və hazırda dünyanın 17 ölkəsində 44 filialı var:

Onun sözlərinə görə, akademiyada 3 ixtisas sahəsi - Kompüter qrafikası və dizayn, Proqram təminatı, Şəbəkə texnologiyaları və sistem inzibatçılığı” üzrə mütəxəssislər hazırlanır:

"Tədris prosesi 1900 akademik saatdan ibarətdir və 2 il yarım çəkir. IT STEP-i bitirən müdavimlərə diplomla yanaşı, Cisco Microsoft və Autodesk şirkətlərinin sertifikatları da verilir”.

Famil Mustafayev bildirib ki, Bakıda fəaliyyətə başlayan akademiyada 8 yaşından 55 yaşınadək 2 min  100 şəxs təhsil ala bilər:

"Hazırda IT STEP-də təhsil almaq üçün 210 nəfər sənəd verib, ilin sonunadək bu rəqəmin 500 nəfərə çatacağı gözlənilir. Bundan başqa, 2018-ci ilədək bu say maksimuma çatdırılacaq".

O, həmçinin əlavə edib ki, akademiyada təhsil əsasən ödənişli olacaq:

"Lakin qarşılıqlı danışıqlara görə, peşə təhsili sistemində oxuyanların bir qismi pulsuz təhsil almaq imkanına sahib olacaqlar. Təxminən 200 nəfərdən 15-i pulsuz oxuyacaq. Tədris prosesi isə nəzərdə tutulan qrup sayı tamamlananda başlayacaq".

Nazilik rəsmisi onu da deyib ki, elektronika ilə bağlı yaxın zamanda beynəlxalq layihəyə də başalayacaqlar.

Qeyd edilib ki, akademiyada 17 kompüter sinifi, robot texnikası, bədii studiya, qrafik dizayn və fotostudiyadan ibarət 4 ixtisaslaşdırılmış laboratoriya fəaliyyət göstərəcək.

Milli Məclisin İqtisadi siyasət, sənaye və sahibkarlıq komitəsinin üzvü, millət vəkili Tahir Mirkişili deyib ki, bu gün həyatımızı İKT olmadan təsəvvür etmək qeyri-mümkündür.

Onun sözlərinə görə, artıq hər bir sahədə texnologiyaların imkanlarından istifadə edilir. Bu da o deməkdir ki, 5 il əvvəl ilə müqayisədə İKT artıq bir sektor deyil:

“Bu gün İKT hər bir sahədə əlavə dəyər yaradan sahəyə çevrilir. Bu, artıq kiçik sektor olmaqdan çıxıb. Dünyada bu sahə sürətlə inkişaf edir. Azərbaycanda da İKT-yə dövlət tərəfindən böyük diqqət ayrılır. Ölkəmizdə bu sahədə böyük potensial var. Məlumdur ki, hazırda dünyada 4-cü sənaye inqilabı baş verir. Yəni, ənənəvi peşə sahələri aradan qaldırılır. Belə bir məqamda dünyada məşhur olan akademiyanın Azəbaycanda yaradılması müsbət haldır”.

Millət vəkili deyib ki, bu gün dünyada ən çox tələb olunan iş yerlər proqramçılıq, mühəndislik kimi texnoloji sahələrdir.

Tahir Mirkişili qed edib ki, bizdə də bu sahələrə yüksək məvacib verilir və ən çox tələb edilən sahələrdəndir:

“ Bu, dünyanın hər yerində belədir. Bu sahələrin böyük prespektivliyi var. .Bu gün Azərbaycan iqtisadiyyatı yenidən qurulub, qeyri-neft sektoru proritet seçilib. Ölkədə dərin islahatlar gedir. İndiki dövrdə iqtisadiyyatda aparıcı qüvvə insan amildir. İnsan amilinin də inkişaf etdiyi sahə İKT-dir. İKT də ideya olmadan mümkün deyil. İdeyada da yaxşı təhsil ilə formalaşır. Bu baxımdan dünayda məşhur olan bir şirkətin Azərbaycanda da fəaliyyətə başlaması bütövlükdə Azərbaycanın iqtisadiyyatında böyük rol oynayacaq”.

Lenovo şirkətinin Azərbaycan nümayəndiliyinin rəhbəri Rasim Bəxşi deyib ki, Azərbaycanda da İKT son dövlər kifayət qədər inkişaf edir:

“ Bizim vaxtımızda belə ixtisaslaşmış müəssisələr yox idi. Proqramçılıqla balaca bir qruplarda məşğul olurduq. Bəzən bizə çətin olurdu. İndi sevinirəm ki, Azərbaycanda ixtisaslaşmış müəssisə yaradılır. Həmçinin, dünya təcrübəsi olan şirkətin ölkəmizdə də fəaliyyətə başlaması müsbət haldır. Bundan başqa, onlar hazır proqramla gəliblər. Bu da böyük amildir. Bu sahə o qədər sürətlə inkişaf edir ki, bəzən biz mütəxəssislər də yenilikləri qaçırda bilirik. Ona görə də, belə müəssisələrin yaranması yaxşıdır ki, uşaqlarımız daim bu yeniliyin içində olacaq. Biz də təcrübələrimizi onlarla bölüşərək gələcəkdə ölkəyə fayda verə bilmələrini təmin edəcəyik”.

Məltəm Talıbzadə