STARTAP AZƏRBAYCAN

Mayın 17-də Azərbaycan Texniki Universitetində (AzTU) texnologiya və innovasiya həvəskarlarının səbirsizliklə gözlədiyi “Bitget Hackaton – Startap” müsabiqəsinin yekun mərhələsi keçirilib.

Xeberler.az məlumat verir ki, müsabiqəyə AzTU, Bakı Mühəndislik Universiteti (BMU) və Azərbaycan Memarlıq və İnşaat Universitetinin (AMİU) tələbələrindən ibarət komandalar qatılaraq, “Blockchain”, “Kriptovalyuta”, “Süni İntellekt” və “Data Analitika” mövzuları üzrə 30-a yaxın startap layihəsi təqdim edilib. Onlardan 19 layihə final mərhələsinə keçərək geniş təqdimat formatında nümayiş etdirib.

Layihələr 5 əsas meyar – komanda və təqdimat bacarığı, ideya, texniki əsaslandırma, praktiki tətbiq imkanı, kommersiya potensialı üzrə peşəkar münsiflər heyəti tərəfindən qiymətləndirilib. Münsiflər heyətinin tərkibi: Osman Gündüz, Elnur Quliyev, Orxan Əhmədov və Aytən Mövsümova.

Gərgin rəqabət və yüksək səviyyəli təqdimatlar nəticəsində qalib komandalar müəyyənləşdirilib və ümumi 3.000 ABŞ dolları məbləğində mükafat (1-ci yer 1.500$, 2-ci yer 1.000$, 3-cü yer 500$) qaliblərə təqdim olunub. Bu hackathon, gənclərin texnoloji yaradıcılığını stimullaşdırmaqla yanaşı, ölkədə startap ekosisteminin inkişafına və rəqəmsal gələcəyin formalaşmasına mühüm töhfə oldu.

Tədbirin təşkilatçıları olan AzTu və Bitget platforması, bu hackathon vasitəsilə Azərbaycanda startap ekosistemi və rəqəmsal texnologiyaların inkişafına dəstəyini nümayiş etdirib. Bu cür təşəbbüslər gənclərin texnoloji biliklərini yalnız nəzəriyyədə deyil, real layihələr və biznes yönümlü məhsullara inteqrasiya edilməsinə imkan yaradır. Belə tədbirlər, gənclərin teorik biliklərini real texnoloji layihələrə çevirməsi, komanda ruhu formalaşdırması və qlobal texnologiya sektoruna çıxması üçün zəruri zəmin yaradır.