MÜSAHİBƏ

"Azərbaycanda açıq məlumat bazaları yoxdur. Açıq internet platforması olaraq biz bir neçə dəfə hökumətə təklif vermişik. Bu, jurnalistika üçün əhəmiyyətlidir. Ona görə ilk olaraq datanın vəziyyətinə fikir verməliyik. 

Xeberler.az FaktXəbər-ə istinadən bildirir ki, bu sözləri Multimedia İnformasiya Sistemləri Texnologiyaları Mərkəzinin rəhbəri Osman Gündüz deyib.

Osman Gündüz bildirib ki, əvvəlcə buna ölkədə kimin səlahiyyəti çatdığını aydınlaşdırmalıyıq: "Kimdən açıq məlumat bazasını istəyə bilərik? Bir il bundan öncə – ötən ilin martın 12-də Prezident İlham Əliyev rəqəmsal hökumətə keçidlə bağlı fərman imzaladı. Həmin fərmana qədər olan dövrdə hər şey Nəqliyyat, Rabitə və Yüksək Texnologiyaları Nazirliyinə məxsus idi. Fərmandan sonra elektron hökumətlə bağlı bütün səlahiyyətlər ASAN Xidmətə verildi. Ancaq açıq məlumat bazaları Rabitə Nazirliyində qaldı.

Prezidentin fərmanına qədər onun adı data.com.az gedirdi. Bütün səlahiyyətlərin ASAN xidmətdə olduğu bildirildi və Nazirlik yeni domen alaraq, bazanın yeni adı "Opendata" olaraq dəyişdirildi.

Mərkəzin rəhbəri bildirdi ki, bu bir il ərzində sözügedən saytda yenilik olmayıb, demək olar ki, faəliyyəti dondurulub: "Bu domen həm pula, həm də qanuna görə boşdur. Düzdür, burda 600 adda informasiya var. Ancaq bu xəstəxana poçt və sair ünvanlarıdır."

O.Gündüz bildirib ki, açıq məlumat bazaları barədə qanun və səlahiyyətlər müəyyən olunmalıdır: "Fikrimcə, bu ASAN-a verilməlidir. Nəqliyyət, Rabitə və Yüksək Texnologiyalar Nazirliyi onun serverini özündə saxlaya bilər. Ancaq mahiyyəti başqa qurumda olmalıdır. İndi uyğun qurumlardan biri ASAN-dır və elektron hökumət də ona verilib. Bildiyimə görə artıq bu istiqamətdə işlər gedir."

"2 il öncəyə qədər rəhbərlik etdiyim qurum informasiyanın alınması barədə monitorinq aparırdı. İnformasiyanın əldə olunması haqqında qanunla bağlı biz bir neçə nəfər mübarizə apardıq. Lakin bu, Parlamentdə qəbul edilmiş, Prezident tərəfindən imzalanmayan tək-tük qanunlardan biridir. Həmin layihədə 29-cu maddə var idi ki, mən buna “jurnalistin çörəyi ağacı” deyirəm. Bu maddədə hansı məlumatları dövlət qurumunun məcbur açıqlamalı olduğu bildirilib. Qanuna əsasən 32 adda informasiya - nazirin telefonu, e-maili, tenderlər, onların nəticələri, xərclənən pul və sair açıq şəkildə verilməlidir. Bu olarsa jurnalist özü üçün xeyli məlumat toplaya bilər", - deyə Osman Gündüz bildirib. 

Azərbaycanda Elektron hökumət quruculuğunda ən dəhşətli problemlərdən birinin rəqəmsallaşma ilə hüquqi təminat arasında əlaqə olduğunu vurğulayan mütəxəssis, bu dəqiqə mygov.az saytının varlığını və orada qeydiyyatdan keçməklə özümüzlə bağlı bütün informasiyaların mövcudluğunu görə biləcəyimizi dedi: "Əlbəttə, çatışmayan məlumatlar da olur ki, bu da  qurumlar arasında inteqrasiyanın kifayət qədər olmaması ilə bağlıdır.

Sizə hər hansı bir sənəd, məsələn yaşayış yerindən arayış lazımdırsa, onu bu saytdan pdf variantında əldə edə bilərsiz. Lakin onu hər hansı bir quruma aparsanız, möhür olmadığı üçün qəbul etməyəcəklər.

Elektron hökumət var, amma hüquqi təminat yoxdur. Qərar verilməli idi ki, sənədin elektron formada olması hüquqi statusu üçün yetərlidir. Bizdə isə bu proses gedir, ancaq çox yavaş gedir.