AVADANLIQ

Gartner analitik şirkəti satılan smartfonların sayının 2004-cü ildən ilk dəfə azalmasını açıqlayıb.

Xeberler.az RYTN-in elektron xəbər xidmətinə istinadən məlumat verir ki, 2017-ci ilin dördüncü rübündə dünyada təxminən 408 milyon qurğu satılıb.

Bu, bir il əvvəlin analoji dövründən 5,6 faiz azdır. Əvvəllər belə hal qeydə alınmayıb.
 
Məlumata görə, azalmaya üç amil səbəb olub. Birincisi, adi telefonları smartfonlara dəyişən insanların sayı azalıb, çünki ucuz telefonların keyfiyyəti aşağı düşüb. İstifadəçiləri bu addımı atmağa Çin qurğuları, eləcə də saxta və ucuz Samsung qurğuları məcbur edib.

Nəticədə onlar keyfiyyətsiz smartfon əvəzinə, keyfiyyətli və klassik telefona üstünlük verməyə başlayıblar. İkincisi, əksər insanlar iPhone kimi bahalı qurğular alır və uzun müddət onları dəyişmirlər, çünki onların normal işləməsinə görə əvəzlənməyə ehtiyac qalmır. Üçüncüsü, istifadəçilər hələ də keyfiyyətli kameraya malik və 4G şəbəkəsini dəstəkləyən qurğuları böyük həvəslə alırlar və onları müasir modellərdə cüzi dəyişikliklər maraqlandırmır.
 
Bildirilir ki, dördüncü rübdə Samsung smartfonlarının satışında 3.6 faiz azalma qeydə alınıb. Buna baxmayaraq Cənubi Koreya şirkəti satılan qurğuların sayına görə liderliyini davam etdirir.
 
Apple şirkəti cüzi fərqlə Cənubi Koreya istehsalçısından geri qalır. ABŞ şirkətinin geriliyinə səbəb kimi ucuz smartfonların olmaması və iPhone X smartfonlarının satışına gec başlanılması göstərilir. Yeni smartfonun istehsalında dekabrda həll olunan problemlər də öz rolunu oynayıb.
 
Eyni zamanda Android əməliyyat sisteminin idarəetməsi ilə işləyən qurğuların sayında 1,1 faiz artım qeydə alınıb.