TƏDBİRLƏR

Məlumat verdiyimiz kimi, hazırda Budapeştdə (Macarıstan) Birləşmiş Millətlər Təşkilatının (BMT) informasiya-kommunikasiya texnologiyaları (İKT) sahəsində fəaliyyət göstərən xüsusiləşmiş təsisatı - Beynəlxalq Telekommunikasiya İttifaqının (BTİ) təşkilatçılığı ilə “ITU Telecom World 2015” sərgisi keçirilir.

Konfrans çərçivəsində yerli şirkətlərimiz Macarıstan rəsmiləri ilə fərdi görüşlər keçirir. İT şirkətlərimiz həyata keçirdikləri layihələr barədə macar nümayəndələrinə məlumat veirirlər.

Xeberler.az-ın məlumatına görə, sərgidə Neuron Technologies şirkəti aktiv təmsil olunur.

Şirkətin direktoru İsmayıl Ələkbərov macar İT mütəxəssislərlə görüşüb və qarşılıqlı əməkdaşlığı müzakirə ediblər.

 İsmayıl Ələkbərov Xeberler.az-a  görüşləri  barədə ətraflı məlumat verib:

“Sərgi çərçivəsində Azərbaycanda İKT-nin inkişafı ilə bağlı nümayəndələrə məlumat veririk. Qeyd edirik ki, son illərdə İKT ökəmizdə yüksək inkişaf edib. Macar tərəfi  bizim İT şirkətlərə maraq göstərir və əməkdaşlıq təklif edirlər”.

İsmayıl Ələkbərov macar rəsmilərindən əldə etdiyi İKT təcrübələrini Azərbaycanda tətbiq edəcəyini bildirib:

“Bir sıra innovasiya və yüksək texnoloji məhsulları Bakıya gətirəcəyimə görə şadam.  Görüşlərimiz zamanı ağıllı şəhər, holoqrafik 3D həlləri, fotovoltaik günəş modulu proqram təminatı, dəmir yollarının ölçülməsi, kənd təsərrüfatı məhsullarının həyat dövrü dəyərinin hesablanması üçün proqram təminatları  barədə geniş söhbət etdik. Bundan sonra bu həllər üzərində çalışıb, yerli bazara uyğunlaşdırıb və sonra bu məhsulları Azərbaycandakı müvafiq sənaye qurumlarına təklif edəcəyik”.

Məltəm Talıbzadə