RƏQƏMSAL DÜNYA

Azərbaycan Milli Elmlər Akademiyasının İnformasiya Texnologiyaları İnstitutunda “Cəmiyyətin və iqtisadiyyatın inklüziv inkişafı problemlərinin araşdırılması” mövzusunda elmi seminar keçirilib.

Xeberler.az  bildirir ki, seminarda şöbə müdiri, iqtisad üzrə fəlsəfə doktoru, dosent Əlövsət Əliyev son illər Azərbaycanda həyata keçirilən sosial xarakterli islahatlardan danışıb. Bu istiqamətdə iqtisadiyyatda yeni inkişaf meyilləri və istiqamətləri, cəmiyyətin və iqtisadiyyatın inkişafının inklüzivliyi haqqında məlumat verib.

O bildirib ki, Azərbaycan iqtisadiyyatında İKT, bilik tutumlu istehsal sferaları və digər elmi-texniki sahələr inkişaf edərək respublikada informasiya cəmiyyətinin və bilik iqtisadiyyatının formalaşmasına zəmin yaradır. Bu, cəmiyyətin sosial-iqtisadi həyatının bütün sahələrinin dinamik və davamlı inkişafının təmin olunmasında böyük əhəmiyyət kəsb edir.

Ölkəmizdə milli innovasiya sisteminin yaradılmasının zəruriliyini bildirən Ə.Əliyev bu sistem vasitəsilə dünya bilik mənbələrinə çıxış imkanının yaradılmasının, biliklərin praktiki tətbiqinin mümkün olduğunu diqqətə çatdırıb.

Məruzəçinin sözlərinə görə, cəmiyyətin və iqtisadiyyatın inkişafının inklüzivliyinin təmin olunması cəmiyyət üzvlərinə, xüsusən müəyyən fiziki qüsuru olan şəxslərə işləmək, təhsil almaq, fəaliyyət göstərmək, cəmiyyətə inteqrasiya olunmaq imkanları yaradılmasını nəzərdə tutur.

Ə.Əliyev vurğulayıb ki, müasir cəmiyyət və iqtisadiyyat inklüzivlik səviyyəsinin yüksəldilməsi istiqamətində inkişaf etdirilməlidir. Bunun tənzimlənməsi üçün regional və sektoral aspektdə qiymətləndirmələr və təhlillər aparılmalıdır. İnklüzivlik səviyyəsinə təsir edən amillər kompleks şəkildə araşdırılmalıdır.