TƏDBİRLƏR

Azərbaycan Milli Elmlər Akademiyasının İnformasiya Texnologiyaları İnstitutunda “İnformasiya və biliklər iqtisadiyyatının innovativ perspektivlərinin qiymətləndirilməsi məsələləri” mövzusunda elmi seminar keçirilib.

Mövzu üzrə məruzə ilə çıxış edən, iqtisad üzrə fəlsəfə doktoru, dosent Əlövsət Əliyev müasir dövrdə iqtisadiyyatın innovasiya və yüksək texnologiyaların tətbiqi ilə inkişaf etdirilməsi, onun neft-qaz ehtiyatlarının ixracından mövcud asılılığının aradan qaldırılması haqqında ətraflı məlumat verib. Respublikada qeyri-neft sektorunun daha sürətli inkişafına nail olunması, informasiya, texnologiya və biliyin geniş tətbiqi nəticəsində inkişaf edən informasiya və biliklər iqtisadiyyatının, o cümlədən rəqəmsal innovasiya iqtisadiyyatının və onun sektorlarının innovativ perspektivlərindən bəhs edib.

Məruzəçi informasiya və biliklər iqtisadiyyatını səciyyələndirən iqtisadiyyat, rəqəmsal iqtisadiyyat və cəmiyyət, qlobal rəqabət qabiliyyətliliyi, kreativlik, innovasiya və sahibkarlıq, texnoloji hazırlıq, iqtisadi stimullaşdırma və institusional rejim, kasıblıq və işsizlik səviyyəsi, bilik iqtisadiyyatı və s. indeksləri təhlil edib. Diqqətə çatdırıb ki, informasiya və biliklər iqtisadiyyatının inteqral indikatorunun hesablanmasını müəssisə və təşkilatlardan elm, İKT, informasiya cəmiyyəti, innovasiya və s. üzrə daxil olan müvafiq statistik hesabat göstəricilərinin nəzərə alınması əsasında da həyata keçirmək mümkündür.

Daha sonra Əlövsət Əliyev informasiya və biliklər iqtisadiyyatı sektorlarının kompozit indeksini formalaşdıran indeks və subindekslərinin qiymətləndirilməsi sahəsində mövcud problemləri izah edib.

Məruzə ətrafında müzakirələr aparılıb, suallar cavablandırılıb.