Qeyd edək ki, Milli Məclis 17 qanunda dəyişikliklər edərək daha 23 növ sənədi rəqəmsallaşdırıb.
Xeberler.az məlumat verir ki, bununla bağlı Azərbaycan İnternet Formunun Prezidenti, ekspert Osman Gündüz münasibət bildirib.
Ekspertin sözlərinə görə, bu, aydın səmada göy gurultusu hesab olunacaq bir addımdır:
"İRİA-nın bu istiqamətdəki səyləri çox təqdirəlayiqdir.
Yəni bu 23 növ sənədlərin artıq myGov üzərindən təqdim edilən variantları həmin sənədlərin kağız formada təqdim edilməsinə bərabər tutulacaq.
Yəni daha anlaşıqlı desək, telefonda göstərilən bu məlumat sadəcə məlumat deyil, rəsmi sənəddir".
Osman Gündüz bildirib ki, bundan öncə də 4 növ sənəd bu formada rəqəmsallaşmışdı:
"Bütün bunlar isə normalda ölkədə rəqəmsal transformasiyanı xeyli sürətləndirməli, kağızsız mühit formalaşdırmalı, insanlara rahatlıq gətirməli, mənasız xərclər azaldılmalıydı".
Ekspert qeyd edib ki, bəzən tam əksi ilə rastlaşırıq:
"Elə bu gün baş verənləri demək yetərlidir. Baxıram ki, MSK-nın keçirdiyi bələdiyyə seçkisi məlumatlarında, TV və medialarda yayılan reklam çarxlarında səsverməyə gələn vətəndaşların ancaq fiziki şəxsiyyət vəsiqəsini təqdim etməsindən söhbət gedir.
Bu necə ola bilər axı?
Dövlətin bir tərəfində nəhəng rəqəmsal inqilabi addımlar atılır, digər tərəfində isə kağız, fiziki sənəd reklam olunur.
Bilmirəm buna nə ad vermək olar düzü. Yumşaq desəm kordinasiyasızlıq göz önündədir, hökumətin, ali orqanların qərarlarına sayğısızlıq baş alıb gedir.
Kütləvi bir identifikasiya kampaniyası ilə bağlı, rəqəmsal sənədə üstünlük verilməsi ilə bağlı İRİA-nın reklam çarxlarının gözə görünməməsi də düşündürücüdür".
Osman Gündüz vurğulayıb ki, bələdiyyə seçkilərində vətəndaş telefonunda myGov-a daxil olaraq məlumatlarını təqdim edə bilər və bu identifikasiya üçün qanunidir:
"Qarşı tərəf vətəndaşın təqdim etdiyi rəqəmsal sənədlərin doğruluğunu isə “myGov Checker” platforması vasitəsilə təsdiqləyə bilər".
