TƏNZİMLƏMƏ

Məlumat verdiyimiz kimi,  Prezident İlham Əliyev  Nazirlər Kabinetinin son iclasında  Rabitə və Yüksək Texnologiyalar  Nazirliyində olan hadisələrə münasibət bildirərək İnformasiya-kommunikasiya sektorunun inkişafı istiqamətində daha da ciddi addımlar atılmalı olduğunu vurğulayıb.

Prezident qeyd edib ki, bu günə  kimi bu sektora  dövlət tərəfindən kifayət qədər  maliyyə ayırılıb, amma  vəsaitdən vicdansızlıqla istifadə olunub. 

İlham Əliyevin bu mesajları onu göstərir ki, həqiqətən də bu sektorda böyük məbləğdə pullar  dövlət  büdcəsinə yox, kimlərinsə cibinə axıb. Prezidentin açıqlamasında həm də bu sektorda aralıq şirkətlərin daha böyük gəlirlər əldə etdiyi vurğulanıb.

Xeberler.az olaraq əslində Prezidentin bu mesajlarla nələri nəzərdə tutduğuna aydınlıq gətirmək üçün Azərbaycan İnternet Forumunun prezidenti Osman Gündüzlə söhbət etik.

O bildirib ki, bu sektordakı əsas problem elə dövlət idarəetməsinin öz xüsusiyyəti ilə bağlıdır:

“Nazirlər Kabinetinin son iclasında Prezident İKT sektorunda büdcəyə daxilolmaların azlığını, böyük İT layihələrin faydasının yetərli olmadığını, arada gəzən şirkətlərin böyük gəlirlər əldə etdiyini vurğulayıb. Məncə,  bu sektordakı əsas problem elə dövlət idarəetməsinin öz xüsusiyyəti ilə bağlıdır. Uzun illərdir ki , RYTN 3 funksiyanı icra edir : kommersiya, tənzimləmə və dövlət nəzarəti. Əlbəttə, bir qurum qanuni olaraq həm alış-verişlə məşğul olub, həm də   bazarda qayda -qanun müəyyən edirsə,  burda problemlərin olacağı qaçılmazdır”.

Osman Gündüz deyib ki,  bu sektorda nəhəng dövlət-kommerisya infrastrukturu formalaşıb:

“Hesablamışdıq ki, bir dövlət provayderinin- Bakinternet-in  aylıq gəliri 4 - 5 milyon manatdır. Yeri gəlmişkən, indi məlum olur ki, bu qurum heç Delta Telecom-dan aldığı internetin də pulunu  ödəmirmiş. Əksinə , dövlət hesabına aldığı interneti digər “doğma” provayderlərə də verirmiş ki, biznes qursunlar və büdcəyə vergi ödənilmədən kommersiya ilə məşğul olsunlar . Dövlət qurumu kommersiya ilə də məşğul olduğundan təbii ki , ən uğurlu layihələr, tenderlər bunlara çatırdı, digər özəl qurumlar isə bundan əziyyət çəkirlər”.

Forum prezidenti vurğulayıb ki,  beynəlxalq trafikdən istifadə və fiber optik infrastrukturun qurulmasında həqiqətən də adları heç kimə məlum olmayan, daha doğrusu sonradan məlum olan şirkətlərdən istifadə edilib:

Osman Gündüz hesab edir ki, indi məqamdır ki, bu sektorda ciddi struktur islahatları aparılsın:

"Əlbəttə , bu cür mühitdə  Prezidentin də qeyd etdiyi kimi, arada gəzən şirkətlər üçün münbit şərait formalaşır. Düşünürəm ki,  bəlkə də indi məqamdır ki, bu sektorda ciddi struktur islahatları aparılsın, nazirliyin funksiyaları ayrılsın. Beynəlxalq praktikada olduğu kimi müstəqil tənzimləyici qurum – Telekommunikasiya Şurası yaradılsın. Kommersiya səlahiyyətləri  isə ayrılsın, hazırda bu sektroda fəaliyyt göstərən dövlət və yarım-dövlət kommersiya qurumları, MMC-lər, sovetdən qalan istehsalat birlikləri özəlləşdirilsin”.

Məltəm Talıbzadə